Sérfræðingur í rafrænni skjalavörslu

Vilt þú verða hluti af nýrri og stækkandi fageiningu innan Þjóðskjalasafns Íslands sem leitar snjallra lausna og leiðir stafræna umbreytingu safnsins, þ.m.t. viðtöku, varðveislu og miðlun rafrænna gagna til að tryggja örugga meðferð rafrænna gagna með réttindi borgaranna, hag stjórnsýslunnar og varðveislu sögu íslensku þjóðarinnar að leiðarljósi?

Laust er til umsóknar starf sérfræðings í rafrænni skjalavörslu innan fageiningarinnar gagnaskila og eftirlits. Starfið felst einkum í ráðgjöf og fræðslu um rafræna skjalavörslu við afhendingarskylda aðila og viðtöku rafrænna gagna frá þeim. Auk þess tekur viðkomandi þátt í ýmsum öðrum verkefnum Þjóðskjalasafns.

Helstu verkefni eru:
• Viðtaka, prófun og frágangur rafrænna gagna til langtímavarðveislu.
• Ráðgjöf um rafræna skjalavörslu til afhendingarskyldra aðila, þ.m.t. um afhendingu rafrænna gagna til Þjóðskjalasafns.
• Eftirlit með skjalavörslu og skjalastjórn afhendingarskyldra aðila.
• Kynning á reglum og samning fræðsluefnis og kennsla á námskeiðum um rafræna skjalavörslu.
• Að þróa áfram aðferðir við varðveislu rafrænna gagna og fylgjast með þróun í málaflokknum í nágrannalöndunum.

Hæfniskröfur:
• Menntun í tölvunarfræði, verkfræði, kerfisfræði eða hliðstæð menntun er áskilin.
• Þekking á skjalfræði, upplýsingafræði eða skjalasöfnum er kostur.
• Fjölbreytt reynsla á sviði tölvumála er áskilin.
• Áhugi á nýsköpun í stafrænni þjónustu við borgarana og stjórnsýsluna.
• Góð kunnátta á miðlum og stöðlum er varða vörslu og flutning rafrænna gagna er æskileg.
• Góð kunnátta í íslensku og ensku í ræðu og riti er áskilin.
• Reynsla af verkefnastjórnun er kostur.
• Færni í mannlegum samskiptum, teymisvinnu og sjálfstæði í vinnubrögðum er áskilin.
• Framsækni og framkvæmdagleði.